‑Tɔɔ 'ʋn ‑ma ‑jeblʋ
143
Dafi 'a 'dʋ.
Tʋ "bo, ɛ 'wɔn 'ma baewlu,
ɛ ‑te' doun", ɛ 'je 'ma kwa 'di ‑tee' wlu 'wɔn,
ɛ mɛ ‑ɛɛ' pooa wlu fai",
‑ɛ ‑srɛai", ɛ kpʋn 'ma baewlu.
2 ‑Ɩn ‑ke ‑ma "juɛi nʋʋ i 'bo 'pee 'wlʋɛ,
"Isrɛi due' koun ‑gbai' se 'e 'kmʋ "kpei nɩ 'de ɛ "juɛi.
3 'Ma tʋnyɔ a pleɛ 'ʋn kɩɩn,
ɔ nɩɛ "i ɔ 'je 'mii waa 'de 'blʋɔ;
ɔ poɛ 'ʋn 'de "bɛɛ kwie 'di,
ka nyʋ ‑mɛa tɛin" nɩa.
4 'Ma ‑suu "kaiɛ "jrii, tai' "maa 'ʋn 'ɛ.
5 'Ɩn poɛ tɛin" 'a ‑tɩ' ‑kwlʋ o,
dɩ ɛ nʋa 'de ɛɛ' nɔ" tu 'di,
'ma ‑sɛ de 'ma jɩ 'tmʋ,
‑wɛe 'ma naa dɩ ‑ma sʋn nʋa tɔ' "kpei.
6 'Ɩn sroɛ sɩn 'de ɛ o;
'ma ‑suu a 'wla ɛɛ' ‑fli,
ka 'blʋa "ni sea 'ʋn nɩ nɩa,
'ka 'ɩn nɩ 'de ɛ "juɛi. ‑Te' ‑kwlʋ.
7 Ɛ ‑too" ɛ 'je 'ma baewlu kpʋn, 'oo Tʋ "bo, 'ma sea'.
Ɛ 'bo ɛɛ' "juua 'kwla ‑tu" ɛ 'de 'ʋn ‑pee,
‑bo ɛ se ‑mɛ nɩɛ,
‑mɛ 'ɩn ke nyʋ ‑nɩa 'de 'mɛbie "wɛin a ja ‑kooa'.
8 Ɛ 'tmʋʋ 'ʋn ɛɛ' 'diwɔnmɔ ‑tɩ ‑klae'' pɛɛn,
dɛ ‑nʋɛ 'ɩn ‑teɛ' 'ma ‑cɛ" 'de ɛ 'kwa. Ɛ tɔɔ 'ʋn ‑jeblʋ 'ɩn 'jea kpa,
Dɛ ‑nʋɛ 'ma "biiɛ 'de ɛ o.
9 Ɛ seie 'ʋn 'de 'ma tʋnyʋ 'kwa, 'oo Tʋ "bo;
Dɛ ‑nʋɛ 'de ɛ ‑pʋn" 'bo 'ma ‑pɔn 'kwla paa' i.
10 Ɛ tɔɔ 'ʋn ɛɛ' ‑kwlʋ' ‑tɩ nʋa',
Dɛ ‑nʋɛ ɛ 'mɛ ‑nɩ 'ma Kea. Ɛɛ' ‑suu 'dɔe po 'ʋn ‑jeblʋ ‑srɛai" o:
11 'De ɛɛ' 'nynɩ 'a ‑tɩ' 'ʋn ɛ,
Tʋ "bo, ɛ "nyɩ 'ʋn 'kmʋnɩa',
'de ɛɛ' "isrɛa' 'ʋn, ɛ ‑sa 'ʋn 'de 'kle 'di.
12 'De ɛɛ' 'diwɔnmɔa' 'ʋn, ɛ ‑sa 'ma tʋnyʋ i,
‑wɛe ɛ 'je nyʋ ‑ʋʋa ‑tua" 'ʋn 'kle 'kmʋ ‑sa,
dɛ ‑nʋɛ 'ɩn nɩɛ ɛɛ' "juɛi nʋʋ i ‑o.